O medio de comunicación dixital interesado deberá remitir a súa solicitude de selo a través do formulario dispoñible nesta mesma páxina web, cubrindo todos os campos necesarios. Ademais deberán quedar acreditados os requisitos establecidos anteriormente polo que se precisará:
- Documento de constitución da sociedade, entidade ou alta do/a traballador/a autónomo/a para xustificar que a actividade xornalística.
- Data de alta do hosting do medio.
- Xustificante do contrato laboral da persoa que realiza e coordina as labores informativas para xustificar que é titulada ou membro do Colexio.
- Composición do cadro de persoal do medio coas labores que realizan cada un deles e a súa titulación.
- DNI da persoa solicitante.
- Xustificante de pagamento das taxas do rexistro ou xustificante da colexiación (segundo se aplique).
- Documento SEPA para domiciliación de taxas (se se aplica).
Para calquera dúbida sobre a solicitude de inscrición en NRede, podes contactar co Colexio de Xornalistas no correo electrónico xornalistas@xornalistas.gal ou no teléfono 981 935 670.
Os membros do Colexio Profesional de Xornalistas de Galicia que presenten a solicitude para a inclusión dun medio terán un desconto do 100%.
O CPXG estableceu, no resto dos casos, unha taxa fixada en 50 € anuais.
A comisión do Rexistro de Medios Dixitais Galegos estudará caso por caso as solicitudes recibidas e nun prazo máximo de 2 meses mandará a súa resolución á persoa remitente da solicitude. A devandita resolución quedará ratificada en reunión ordinaria da Xunta de Goberno.
No caso de resolución positiva, o medio quedará inscrito no Rexistro de Medios Dixitais Galegos no espazo establecido para tal fin dentro da web institucional do CPXG xornalistas.gal, onde aparecerán os seus datos. Igualmente, deberá colocar no lugar que determine dentro da súa portada o selo identificativo co número de rexistro enviado polo CPXG.
A comisión poderá pedir documentación complementaria, se así o considera, para tramitar ou denegar unha solicitude, que deberá de achegarse nos quince seguintes días de ter recibido o requirimento. No caso de non recibir resposta, a solicitude será descartada.
No caso de resolución negativa, abrirase un prazo de 1 mes para recorrer perante a Xunta de Goberno do Colexio, quen revisará o recurso na súa primeira xuntanza despois de presentado este. A continuación comunicarase á persoa solicitante a devandita conclusión, perante a cal non cabe recurso algún.
As altas tramitaranse a través do formulario dispoñible na páxina web do CPXG.
A baixa do Rexistro de Medios Dixitais Galegos poderase facer en calquera momento. O distintivo terá que ser retirado do espazo web do medio no momento en que a comisión dea notificación da recepción da solicitude.
As baixas tramitaranse a través do mail xornalistas@xornalistas.gal, indicando no asunto ‘Baixa Rexistro de Medios Dixitais Galegos’.
O rexistro terá unha duración bienal que se renovará tacitamente, salvo que a persoa solicitante o faga saber. A taxa cargarase (de ser o caso) na conta do medio rexistrado facilitada para tal fin.
A comisión do Rexistro de Medios poderá revogar o selo no caso de se detectar o incumprimento dalgunhas das condicións referidas neste documento ou no Código Deontóloxico do Xornalismo Galego do CPXG.
