Nilufar Saberi (ou Nely, como lle gusta que a chamen), naceu en Teherán en 1966. Activista de longa traxectoria, é moi coñecida no noso país, xa que leva 40 anos vivindo en España, onde chegou coa súa familia como refuxiada sendo nena. Durante estas catro décadas leva denunciando as violacións que se están a cometer no seu país, especialmente no tocante aos dereitos das mulleres e nenas. No seu tempo fundadora e máis tarde presidenta da Asociación Iraní Pro-Derechos Humanos, hoxe en día prefire adicarse á divulgación de forma independente, como dan conta as súas colaboracións con organizacións como Amnistía Internacional, Medicus Mundi, Cultura de Paz, Culturas y Tierra e moitas outras..

As charlas de Saberi en Galicia terán lugar o mércores 8 de novembro ás 11:30 no IES Pontepedriña de Santiago de Compostela (Rúa de Amor Ruibal, 28), ese mesmo día ás 19:30 no Local de Amnistía Internacional na Coruña (Rúa Rafael Alberti 5, 1ºC), o xoves 9 de novembro ás 20:00 no Patio do Vello Cárcere de Lugo (Praza da Constitución s/n), e o venres 10 de novembro ás 19:00 na Sala Sargadelos de Vigo (Rúa Urzáiz 17). A actividade no IES de Santiago é só para escolares e non está aberta ao público xeral.