Este vindeiro xoves 20 de novembro, entre as 10:00 e as 14:00 da mañá, o Colexio Profesional de Xornalistas de Galicia celebra no auditorio da Facultade de Ciencias da Comunicación da USC a xornada A comunicación corporativa: Comunicar con estratexia, realizada coa subvención da Deputación da Coruña e a colaboración da Facultade.
O Colexio Profesional de Xornalistas de Galicia organiza na mañá do xoves 20 de novembro no auditorio da Facultade de Ciencias da Comunicación da USC, a xornada A comunicación corporativa: Comunicar con estratexia. A xornada, que completa os seminarios sobre comunicación nas empresas das vindeiras semanas, realízase coa subvención da Deputación da Coruña e a colaboración da Facultade, e contará con representantes de axencias e de gabinetes de comunicación das empresas.
Este mércores 5 á tarde, o Colexio Profesional de Xornalistas de Galicia na Cadena Ser outro dos obradoiros que levan ás redaccións galegas a formación para mellorar o tratamento informativo das violencias contra as mulleres. O xornalista Ángel Suanzes, un dos profesionais formados especificamente na materia polo Colexio, trasladou aos e ás profesionais da emisora coñecementos, ferramentas e técnicas para informar dunha maneira axeitada e responsábel sobre as violencias machistas. Esta formación, pioneira na nosa comunidade, é posíbel grazas ao convenio asinado coa Consellería de Politica Social e Igualdade da Xunta de Galicia, no marco do Pacto de Estado contra a Violencia de Xénero para o ano 2025.
A Corporación de Servizos Audiovisuais de Galicia (CSAG) abre convocatoria dunha proba selectiva para a formalización dun contrato de traballo formativo para a obtención da práctica profesional na categoría de locutor ou locutora de radio.
O Colexio Profesional de Xornalistas de Galicia organiza nas mañás dos días 11, 13 e 17 de novembro A comunicación corporativa: Comunicar con estratexia, un ciclo de seminarios online que analizará aspectos como as estratexias de comunicación dixital, a comunicación corporativa ou o deseño dun plan de comunicación. A formación estará impartida por Bárbara G. Vilariño, Xosé Luis Reza e María Isabel Míguez González e o programa complementarase cunha xornada presencial o 20 de novembro. Xa está aberta a inscrición, libre e gratuíta, para os distintos seminarios, que se realizan coa subvención da Deputación da Coruña e a colaboración da Facultade de Ciencias da Comunicación da USC.
No día de onte, o Colexio Profesional de Xornalistas de Galicia realizou dous novos obradoiros nas redaccións galegas nos que se achegaron coñecementos, ferramentas e técnicas para mellorar o tratamento informativo das violencias contra as mulleres. Pola mañá, Carmen Quintela foi a encargada de levar a formación ás e aos xornalistas de El Progreso de Lugo, mentres que Marga Tojo fixo o mesmo á tarde na redacción da axencia Europa Press. Ambas as dúas foran formadas especificamente na materia polo Colexio, dentro desta experiencia pioneira posta en marcha grazas ao convenio coa Consellería de Politica Social e Igualdade da Xunta de Galicia, no marco do Pacto de Estado contra a Violencia de Xénero para o ano 2025.
O Colexio Profesional de Xornalistas de Galicia, o Concello de Pontevedra e a Asociación de Informadores Cinematográficos de España (AICE) organizan o vindeiro 26 de novembro unha conversa aberta para público profesional, baixo o título Informar sobre cine. O encontro, que vai celebrarse a partir das 19.00 horas na Casa da Luz de Pontevedra (Praza da Verdura, s/n), contará coa presenza de María Guerra, Ángel Suanzes e Andrea Villa, e estará encadrada na programación dos Premios Feroz, promovidos pola AICE.
O Colexio Profesional de Xornalistas de Galicia realizou onte, na sede do Faro de Vigo, o primeiro dos obradoiros que levan ás redaccións galegas a formación para mellorar o tratamento informativo das violencias contra as mulleres. Fátima Frieiro, unha das xornalistas formadas especificamente na materia polo Colexio, trasladou aos e ás profesionais do xornal vigués ferramentas profesionais, adaptadas ás esixencias e ritmos de traballo dunha redacción, para mellorar a calidade das informacións sobre as violencias machistas. Esta experiencia, pioneira na nosa comunidade, é posíbel grazas ao convenio asinado coa Consellería de Politica Social e Igualdade da Xunta de Galicia, no marco do Pacto de Estado contra a Violencia de Xénero para o ano 2025
O Encontro de Xornalismo Social "Somos Esenciais", organizado polo Colexio Profesional de Xornalistas de Galicia, coa colaboración de Gadis, serviu para analizar os retos que supón unha información que responde aos problemas da cidadanía e establece vínculos coa propia sociedade. Lara Graña Prieto, Ángel Paniagua Pérez, Alba Chao Vázquez e Carolina Sertal Souto partiron dos traballos que lles valeron o recoñecemento do Premio Somos Esenciais para reivindicar un xornalismo que poña cara á información.
A Bolsa ‘Nacho Mirás’ para xornalistas noveis, organizada e desenvolvida polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da Universidade de Santiago de Compostela, recaeu na súa décima edición en Trescentostrece. Este é un proxecto divulgativo que busca contar, dende cada un dos 313 concellos de Galicia e mediante as redes sociais Tiktok e Instagram, a diversidade cultural, social e histórica do país. A proposta foi presentada por Paula Pérez Cantelar, Xoel Rodríguez Poy e Iria Ramos Mesía.