Xornalismo na Escola ten entre outros obxectivos o de inculcar na xuventude espírito crítico ante a información e as noticias nos medios de comunicación offline e online. O alumnado tratará tamén temas como os riscos e vantaxes das novas tecnoloxías de información e a comunicación (TIC), a necesidade de aprender a utilización (que non o manexo técnico) da comunicación social e a información dixital, a imprescindible mediación e o contraste nas fontes no xornalismo; e o que pode supór para á xente nova a veracidade e o rigor xornalístico.

O proxecto de Xornalismo na Escola é posible grazas a un acordo acadado a finais de 2015 entre o Colexio de Xornalistas de Galicia e a Obra Social La Caixa e que agora se renova e amplía cunha segunda edición máis ambiciosa polo éxito obtido na edición anterior. Barcelona, Sevilla e Madrid, son algunhas localidades onde se veñen celebrando talleres de similares características dende hai uns anos con gran éxito, aceptación e moi bos resultados.

Angel Castro, Susana Bastón, Sara Martínez, Xosé Lois Carrión, Águeda Penedo, Lucía Alvarez, Elvira Alvarez Gayo, Angeles Fernández e Víctor Sariego son os licenciados e licenciadas en Xornalismo –todos eles con ampla traxectoria profesional- que despois dunha selección a nivel galego van impartir os 90 obradoiros en case o mesmo número de Institutos do Ensino de Secundaria (IES) de Galicia. 

CPXG