A sede do Colexio Profesional de Xornalistas de Galicia en Santiago de Compostela acolleu esta mañá o acto de entrega do Premio de Xornalismo 'Somos Esenciais', organizado baixo o lema A información ao servizo da xente polo Colexio, coa colaboración de Gadis, para recoñecer o labor dos e das profesionais da comunicación e a información social como vehículo condutor entre o que pasa na sociedade e a cidadanía, dando voz aos problemas dos axentes sociais e aos efectos que causan. Lara Graña foi a gañadora desta quinta edición pola reportaxe «"García del Cid", el buque de luto y cólera», mentres que Ángel Paniagua recibiu unha mención como finalista polo traballo «La vida tras el suicidio de una hija: "Esto le puede pasar a cualquiera"». No acto participaron tamén a decana do Colexio de Xornalistas, Belén Regueira Leal, José Luis Fernández Astray, director de Comunicación de Gadisa Retail, e María Eimil Méndez, representante de Comunicación de Gadisa. 

A decana do Colexio de Xornalistas abriu o acto lembrando que o certame quere pór de manifesto o carácter esencial do periodismo e "dar visibilidade a tantos bos traballos xornalísticos que se publican nos medios galegos". Regueira anunciou tamén que nesta quinta edición, o premio "vai ter como complemento unha xornada que faremos no outono na cidade de Vigo". Fernández Astray, no nome de Gadis, agradeceu ao Colexio a organización do premio e trasladou o seu recoñecemento á gañadora porque "non é doado atopar unha reportaxe tan ben documentada" e ao finalista polo "importante traballo á hora de denunciar" a realidade do suicidio.

Lara Graña quixo dar as grazas á organización do certame por unha iniciativa "que referenda a boa calidade xornalística que hai en Galicia" e asegurou que o premio era moi importante para ela porque lle permite continuar a mostrar que "hai demasiados puntos negros na administración" na desaparición de María del Carmen Fernández Vázquez e tamén porque ao longo da investigación se viu "acompañada por moita xente que non coñecía" e que co cancelo #MeTooCSIC "conseguimos denunciar os moitos casos de machismo que hai nesta institución": Por todo iso, asegurou, "estou moi animada para seguir traballando por Mari Carmen".

Ángel Paniagua, pola súa banda, manifestou a súa confianza en que "sexamos capaces de transmitir a sociedade que non só somos esenciais, senón tamén necesarios": O finalista reflexionou sobre a maneira de enfocar nos medios o suicidio, unha "realidade difícil", que "non só nos turba, senón que nos interpela". "Segundo tratamos o suicidio, estamos aprendendo a facelo e construíndo estándares e ferramentas xornalísticas", asegurou. 

O xurado do quinto Premio de Xornalismo 'Somos Esenciais' estivo composto por Alexandra Kuntz Peiteado e Fátima Carmena Mayorga, Alba Chao Vázquez, Lara Dopazo Ruibal, Francisco X. González Sarria, Darío Janeiro Pereira, Belén Regueira Leal, Ana Isabel Rodriguez Vazquez e Cristina de la Vega Jiménez.

Premio de Xornalismo Somos Esenciais

O Premio de Xornalismo Somos Esenciais, organizado polo Colexio Profesional de Xornalistas de Galicia, corporación de dereito público que representa aos xornalistas galegos, coa colaboración con Gadis, recoñece o labor dos e das profesionais da comunicación e a información social como vehículo condutor entre o que pasa na sociedade e a cidadanía, dando voz aos problemas dos axentes sociais e aos efectos que causan. 

Na primeira edición do Premio 'Somos Esenciais' resultou gañadora Isabel Bravo co traballo «Cando as preguntas aínda non tiñan resposta», emitido na Radio Coruña - Cadena SER, e finalista a reportaxe «La uci del covid, desde dentro: "No somos héroes"», publicada por Ángel Paniagua en La Voz de Galicia. Na segunda edición, o gañador foi Manuel Rey Pan, polo podcast de GCiencia «O ano da pandemia». O equipo formado por Elena Martín Lores, Pablo Santiago Martínez, Sofía Caamaño Deus e Ruben Alexandre Lopes Martins recibiu tamén unha mención especial como finalistas pola reportaxe «Pechar a fronteira foi como pechar a fiestra da casa», publicada no dixital Xarda e no xornal portugués Público. Gemma Malvido e Vanessa Casteleiro foron as gañadoras da edición de 2022 pola serie de reportaxes en La Opinión A Coruña «Una tarde en Teixeiro: "¿Se porta bien?"», «Con ganas de salir adelante» e «Una mañana en Teixeiro: Deporte, trabajo, estudio y manualidades para volver a la calle»; con María de La Huerta, como finalista coa peza «Suicidio de mayores, un drama silenciado», publicada no mesmo xornal. O ano pasado,  Alba Chao, xornalista de Faro de Vigo, foi recoñecida como gañadora pola reportaxe «Pornografía en la red, la mayor escuela de desigualdad y misoginia», mentres que Carolina Sertal resultou finalista co traballo «Bebés roubados, entre o silencio e a impunidade», publicado en Luzes.