O IES de Oroso recibe este mércores o primeiro dunha serie de tres obradoiros de Xornalismo na Escola "la Caixa"

A quinta edición de Xornalismo na Escola "la Caixa", a iniciativa posta en marcha polo Colexio Profesional de Xornalistas de Galicia e a Obra Social ‘la Caixa’ chega este mércores 7 de abril ao IES de Oroso para impartir un obradoiro virtual, adaptándose así ás necesidades do alumnado no contexto da crise sanitaria. O xoves e venres realizaranse novos talleres neste centro. 

Oroso recibe este mércores 7 de abril a visita da quinta edición de ‘Xornalismo na Escola “la Caixa”’, o programa didáctico sobre os medios de comunicación que desenvolven o Colexio Profesional de Xornalistas de Galicia e a Obra Social ´la Caixa` para mostrar o xornalismo desde outro punto de vista. 

O IES de localidade acollerá un obradoiro de ‘Xornalismo na Escola “la Caixa”’ que se desenvolverá entre as 12:30 e as 14:00 horas. O taller estará impartido pola xornalista Edith Filgueira Rodríguez, cun amplo currículo que abrangue distintos labores na Axencia Efe, La Voz de Galicia, Onda Cero ou El Mundo. O centro recibirá ainda novos obradoiros o xoves 8 ás 8:30 e o venres 9 ás 10:30.   

Estes obradoiros serán realizados coa nova modalidade que fixo nacer a situación sanitaria, a virtual, para adaptarse ás necesidades do alumnado. Ademais, os talleres incluirán a partir de agora un apartado sobre a Covid-19, para fornecer os estudantes con ferramentas para enfrontarse á desinformación neste tema e comprender mellor a información científica. 

O alumnado do IES de Oroso terá a oportunidade de participar así nunha actividade que ten por obxecto familiarizar á mocidade galega co funcionamento dos medios de comunicación, para que os escolares coñezan aspectos como o papel que desempeñan os profesionais do xornalismo e que valoren a importancia de contrastar as informacións. Será un taller dinámico no que tamén se pretende fomentar na xente nova o espírito crítico e contribuír a que sexan conscientes dos riscos e as oportunidades que lles ofrecen as novas tecnoloxías de información e a comunicación.

Xornalismo na Escola “la Caixa”

Estes obradoiros forman parte dun total de 90 que pretenden chegar a miles de rapaces e rapazas de toda a comunidade. Os seis xornalistas seleccionados tratarán de fomentar que a xuventude galega coñeza o funcionamento dos medios de comunicación, así como estimular o seu espírito crítico ante os contidos que se difunden nos distintos soportes offline e online. Deste xeito, os alumnos tratarán temas como os riscos e vantaxes das novas tecnoloxías de información e a comunicación (TIC), a necesidade da mediación e o contraste de fontes no xornalismo ou, tamén, como lle afecta á xente nova a veracidade e o rigor xornalístico.

Este proxecto, que se pode seguir en twitter baixo o hashtag #XornalismoNaEscolalaCaixa, naceu grazas a un acordo acadado a finais de 2015 entre o Colexio Profesional de Xornalistas de Galicia e a Obra Social 'la Caixa'. As catro primeiras edicións de ‘Xornalismo na Escola “la Caixa”’ desenvolveron con grande éxito entre o 2016 e o 2019 máis de 360 talleres talleres de comunicación en numerosos puntos da xeografía galega, levando estes obradoiros a miles de alumnos e alumnas da comunidade.

A Obra Social ‘la Caixa’ está a levar esta iniciativa a outras cidades e comunidades autónomas, onde xa hai algúns anos que se puxo en marcha o proxecto. Cataluña, Sevilla e Madrid son algúns deses lugares onde se ven celebrando obradoiros de similares características.

CPXG