O programa didáctico sobre os medios de comunicación do Colexio Profesional de Xornalistas de Galicia e a Obra Social ´la Caixa` visita esta semana o IES Manuel García Barros da Estrada, o IES nº 1 de Ordes, o CPI Pecalama de Tordoia e o IES Terra do Xallas de Santa Comba. Así, o programa desta nova semana de obradoiros de xornalismo é o seguinte: 

• Martes 23 no IES Manuel García Barros da Estrada, entre as 8:45 e as 10:30, entre as 10:30 e as 12:15 e entre as 12:30 e as 14:15 horas. Imparte os obradoiros Susana Bastón Carballo.
• Martes 23 no IES nº 1 de Ordes, entre as 9:10 e as 10:50 e entre as 13:00 e as 14:40 horas. Imparte os obradoiros Davide Fernández García.
• Xoves 25 no CPI Pecalama de Tordoia , entre as 14:50 e as 16:30 horas. Imparte o obradoiro Davide Fernández García.
• Venres 26 no IES Terra do Xallas de Santa Comba, entre as 8:50 e as 10:30 e entre as 10:50 e as 12:30 horas. Imparte os obradoiros Susana Bastón Carballo.

Estes obradoiros forman parte dun total de 90 que pretenden chegar a miles de rapaces e rapazas de toda a comunidade. Susana Bastón Carballo, Pablo Díaz Bouza, Davide Fernández García, David Fontán Bestilleiro, Alfonso González Redondo e Edgar Melchor Fernández son os e as xornalistas –todos eles con ampla traxectoria profesional– que están impartindo talleres en distintas localidades galegas.

Durante os meses de febreiro, marzo, abril e maio, os seis xornalistas tratarán de fomentar que a xuventude galega coñeza o funcionamento dos medios de comunicación, así como estimular o seu espírito crítico ante os contidos que se difunden nos distintos soportes offline e online. Deste xeito, os alumnos tratarán temas como os riscos e vantaxes das novas tecnoloxías de información e a comunicación (TIC), a necesidade da mediación e o contraste de fontes no xornalismo ou, tamén, como lle afecta á xente nova a veracidade e o rigor xornalístico.

Este proxecto, que se pode seguir en twitter baixo o hashtag #XornalismoNaEscolalaCaixa, naceu grazas a un acordo acadado a finais de 2015 entre o Colexio Profesional de Xornalistas de Galicia e a Obra Social La Caixa. As tres primeiras edicións de ‘Xornalismo na Escola “la Caixa”’ desenvolveron con grande éxito no 2016, 2017 e 2018 uns 250 talleres de comunicación nun cento de puntos da xeografía galega, levando estes obradoiros a miles de alumnos e alumnas da comunidade.

A Obra Social ‘la Caixa’ está a levar esta iniciativa a outras cidades e comunidades autónomas, onde xa hai algúns anos que se puxo en marcha o proxecto. Cataluña, Sevilla e Madrid son algúns deses lugares onde se ven celebrando obradoiros de similares características.

CPXG