O grupo editorial Prensa Ibérica Media, ao que pertencen Faro de Vigo e La Opinión de A Coruña, decidiu presentar recurso de amparo no Tribunal Constitucional, tralo fallo do Tribunal Supremo que condena ao xornal La Opinión de Zamora a pagar unha indemnización de 15.000 euros a un home do que publicou unha fotografía obtida da súa conta de Facebook, por considerar este feito como unha intromisión ilexítima no dereito á propia imaxe.

Prensa Ibérica afirma que acata a sentenza pero non comparte os criterios, posto que considera que o mesmo tribunal establece "que o diario non vulnerou en ningún momento o dereito á intimidade nin a honra do demandante" e que "os feitos relatados son de relevancia informativa". Neste sentido, entende que o caso "presenta un claro conflito entre dous dereitos fundamentais recollidos na Constitución Española: o de información e o do dereito á propia imaxe", polo que apela ao Constitucional para establecer cal destes dous dereitos ten prevalencia.

O fallo do Supremo estabelece que publicar unha fotografía nunha rede social accesíbel ao público en xeral autoriza "que eses terceiros podan ter acceso ao contido desa conta e interactuar co titular, pero non que poda publicarse a imaxe do titular da conta nun medio de comunicación", polo que entende que a súa publicación requeriría do consentimento expreso previsto no artículo 2.2 da Lei Orgánica 1/1982 de protección do dereito ao honor e á propia imaxe. 

CPXG