Coa elección dos conselleiros que han supervisar durante os próximos catro anos a actuación da CRTVG e todo o relacionado co funcionamento dos medios públicos –TVG e Radio Galega-, os tres grupos parlamentares volveron infrinxir a normativa en vigor. Máis unha vez, como veu sucedendo desde 1985 até hoxe, optaron por cubrir maioritariamente os postos dese órgano de control social con persoas que responden na súa maior parte a un perfil estrictamente partidario. O Consello de Administración volve ser un calco da comisión parlamentar que ten por obxectivo a vixilancia política dos medios públicos. Para nada foron escollidos en representación da sociedade e dos seus intereses xerais, como está estipulado.

O Colexio Profesional de Xornalistas de Galicia (CPXG) considera que, coa adxudicación hoxe das dúas licencias de televisión dixital terrestre de cobertura autonómica, a Xunta de Galicia impide a consolidación dun espazo audiovisual galego que debería xogar un papel estratéxico no desenvolvemento económico e social de Galicia.

O Colexio Profesional de Xornalistas de Galicia (CPXG) considera moi grave e atentatoria contra o dereito á información a esixencia de cobro por parte do RCD de A Coruña a xornalistas de La Voz de Galicia e de Radio Voz por acceder ás instalacións do Estadio Municipal de Riazor. O CPXG celebra a claridade e a contundencia coa que a Sección Segunda da Audiencia Provincial de A Coruña dictou sentencia condenatoria contra esa actuación do RCD de A Coruña, declarando o dereito dos xornalistas de La Voz de Galicia e de Radio Voz a acceder libre e gratuitamente ó Estadio de Riazor e ás dependencias anexas para obter información.

O dereito á información é a outra cara do dereito ó sufraxio. O deber de calquera goberno democrático é garantir que tódolos cidadáns teñan acceso libre e continuado a información veraz e plural sobre a actividade do goberno, das forzas da oposición e a tódolos indicadores obxectivos da realidade política, económica, social e cultural do país e da súa inserción no mundo. Ese acceso á información é imprescindible para a conformación democrática da opinión, que é a que acabará decidindo o sentido do voto. Cando isto non é así, cando o contido da información está mediatizado por intereses que poden ser contrarios á busca da verdade, o dereito ó sufraxio queda reducido á expresión formal dun ritual carente de verdadeira esencia democrática.