A Xunta de Goberno do Colexio Profesional de Xornalistas de Galicia (CPXG) insta ao xuíz decano da Coruña, Antonio Fraga Mandián, a facilitar o traballo dos informadores e o acceso ós edificios xudiciais da cidade, despois de que esta mañá policías nacionais impedisen a entrada de dous xornalistas aos xulgados coruñeses, segundo a información facilitada por un dos afectados.

Ante a grave crise económica, publicitaria e de vendas que está afectando aos diarios, o Col.legi de Periodistes de Catalunya, o Colexio Profesional de Xornalistas de Galicia, a Asociación de la Prensa de Madrid e a Unió de Periodistes Valencians apoian un Plan de Axuda gobernamental ao sector, coa premisa de que sexa transparente, debatido e con compromisos para todas as partes.

A Xunta de Goberno do Colexio Profesional de Xornalistas de Galicia (CPXG) protesta pola impunidade na que pode quedar a morte do cámara galego de Telecinco José Couso despois de que Audiencia Nacional revogase por segunda vez o procesamento contra tres militares estadounidenses e ordenase o peche do caso.

O CPXG, ante a cancelación da emisión do episodio do programa de TVG A caixa negra sobre a crise das ‘vacas tolas’, previsto para o pasado martes, quere manifestar a súa preocupación polo que considera un episodio de censura e/ou de intromisión de criterios non profesionais nun medio público.