O Colexio Profesional de Xornalistas de Galicia (CPXG) organiza en colaboración con BURLA NEGRA, a sección cultural da PLATAFORMA NUNCA MÁIS, unha exposición sobre a marea negra do Prestige coa que pretende, dunha banda, poñer de relevo o traballo dos fotoxornalistas nesta crise e, doutra, denunciar as trabas coas que se están a atopar os profesionais da comunicación para desenvolver o seu traballo. E, sobre todo, aportar un gran máis de area en axuda dos máis afectados.

A Xunta de Goberno do Colexio Profesional de Xornalistas de Galicia (CPXG) desexa facer público o seguinte comunicado:

O Pleno Territorial, Xunta de Goberno e representantes das Demarcacións, do Colexio Profesional de Xornalistas de Galicia (CPXG), reunido en Santiago, quere manifestar novamente a súa solidariedade con tódolos galegos, asturianos, portugueses, cántabros e vascos, directamente afectados polas consecuencias do desastre do "Prestige"; unhas consecuencias coas que, desventuradamente, aínda habemos convivir meses, quizais anos

A Xunta de Goberno do COLEXIO PROFESIONAL DE XORNALISTAS DE GALICIA, corporación de Dereito Público que agrupa a 1.083 profesionais da comunicación, desexa transmitir á opinión pública a súa preocupación polas dificultades que o Goberno Central e a Xunta de Galicia están a poñer diante dos xornalistas para informar axeitadamente sobre as circunstancias nas que tivo lugar a deriva e posterior naufraxio do petroleiro "Prestige" e acerca da evolución das sucesivas mareas negras de fuel pesado que destes feitos se derivaron e están a derivarse. O apagón informativo decretado, entre outros, polas autoridades da Mariña Mercante coa fin de evitar que os xornalistas poidan contrastar diferentes versións sobre estes feitos e a negativa a suministrar datos que os profesionais se ven na obriga de recabar de entidades que dependen dos gobernos francés e portugués constitúen dous exemplos intolerables do intento que están a desenvolver as autoridades españolas e galegas de someter ós medios de comunicación ó seu discurso oficial cando, nos asuntos relacionados coas administracións públicas, o dereito fundamental á información debe prevalecer sempre por riba de calquera restricción que vulnere inxustificadamente o principio da transparencia informativa ó que estan obrigadas.