Este ano, o Día das Letras Galegas dedícase á xornalista e colexiada Begoña Caamaño, unha homenaxe que pon en valor tamén o seu labor como profesional da comunicación. O Colexio de Xornalistas, coa colaboración da Secretaría Xeral da Lingua da Xunta de Galicia, reivindica a súa figura como xornalista cun podcast de cinco episodios, dirixido por Lucía Junquera, e un encontro periodístico que se desenvolveu o sábado 25 de abril na Casa das Máquinas de Santiago.

A nova edición da bolsa 'Nacho Mirás', organizada e desenvolvida polo Colexio Profesional de Xornalistas de Galicia e patrocinada por Abanca, continúa co obxectivo de apoiar proxectos xornalísticos, abríndose a toda a profesión. O proxecto conta tamén coa colaboración da Facultade de Ciencias da Comunicación da USC.

Os obradoiros contra a desinformación, organizados polo Colexio de Xornalistas coa subvención da Deputación de Lugo, levarán a alfabetización mediática a vinte localidades de toda a provincia. Esta formación está deseñada para trasladar a poboación adulta coñecementos contra as mentiras e ferramentas para combatelas.

Unha nova edición dos obradoiros contra a desinformación do Colexio Profesional de Xornalistas de Galicia chega aos centros de ensino medio da Coruña grazas ao convenio asinado coa Deputación da Coruña, a través da área de Dereitos Civís. O alumnado de dez centros da provincia poderán coñecer as estratexias da desinformación e as ferramentas para combatela nun total de 18 talleres que se realizarán ao longo deste ano en nove localidades da provincia.