Bolsas NewsSpectrum para medios de linguas minoritarias
Do ao
O Instituto Internacional da Prensa e MIDAS abren a primeira convocatoria das bolsas NewsSpectrum, dirixidas a xornalistas e outros profesionais de medios de comunicación de linguas minoritarias (incluídos os de linguas de poboación inmigrante e lingua romaní) co obxectivo de incentivar a colaboración cos medios de linguas maioritarias, todos eles situados na Unión Europea.
NewsSpectrum dispón de financiamento para 40 bolsas en 2021 que se distribuirán en dous tipos de programas: o Collaborative Reporting Fellowship (proxectos de xornalismo colaborativo) e o Professional Placement Fellowship (estadías para profesionais). O Collaborative Reporting Fellowship está dirixido a aqueles traballos xornalísticos que se leven a cabo de maneira conxunta entre xornalistas de medios de linguas minoritarias (freelancers incluídos) e de medios de linguas maioritarias, mentres que o programa Professional Placement Fellowship busca promover que profesionais de medios de linguas minoritarias realicen estadías curtas ou visitas de traballo en redaccións de medios de linguas maioritarias.
Ambos os dous tipos de bolsas deberán ter unha duración mínima de dúas semanas, aínda que existe certa flexibilidade neste aspecto, e desenvolverse en calquera momento dentro do período comprendido entre xuño e o 31 de decembro de 2021. Tanto o profesional empregado polo medio de lingua minoritaria como o medio de lingua maioritaria poderán pedir ata 6 000 € cada un por bolsa.
As solicitudes poden enviarse até o 28 de maio, en inglés, a través da páxina de NewsSpectrum. Máis información aquí.