Por descanso vacacional, o Colexio Profesional de Xornalistas de Galicia permanecerá pechado entre os días 10 e o 21 de agosto, ambos os dous incluídos. Así mesmo, en agosto só se enviará un número do F5, o boletín electrónico semanal do Colexio, no último venres do mes.
O rexistro NRede do Colexio Profesional de Xornalistas de Galicia segue a incluír novos medios dixitais interesados en garantir o seu traballo xornalístico co selo de Medio Dixital Galego. Coa nova incorporación da Revista Pincha chegan a vinte e unha as cabeceiras acreditadas coa certificación que garante que a súa información é froito dun traballo profesional. Os medios interesados seguen a poder solicitar a súa inscrición, gratuíta se a tramita unha persoa colexiada.
Seguindo a política de dispoñibilizar todos os cursos online de balde para colexiados e colexiadas, o Colexio Profesional de Xornalistas de Galicia abre hoxe de maneira gratuíta os tres últimos cursos que se mantiñan como privados na súa plataforma de formación: Comunicación social para combater o discurso do odio, Como comunicar cambio climático con éxito e Excel para xornalistas: aprende a interrogar follas de cálculo para atopar historias.
A sede do Colexio Profesional de Xornalistas de Galicia acolleu na mañá de onte, Día Mundial do Cerebro, un almorzo on/off organizado polo CPXG e Dano Cerebral Galicia, que serviu para presentar as especificidades do dano cerebral adquirido frente a outras discapacidades, coñecer de primeira man o testemuño dunha persoa con esta discapacidade e facilitar algunhas pautas para mellorar a información sobre esta temática. No acto participaron Irene Cancelas Sánchez, responsable de Comunicación de Dano Cerebral Galicia; Pablo Freire Portela, traballador social de Dano Cerebral Lugo e membro do Grupo de Comunicación de Dano Cerebral Galicia; e Lucrecia Alcolado Sánchez, unha muller de 56 anos de Lugo que ten dano cerebral adquirido.
A xornalista Pilar Rodríguez Losada impartiu este xoves 16 de xullo en Quiroga un novo obradoiro de alfabetización contra a desinformación organizado polo Colexio de Xornalistas coa subvención da Deputación de Lugo. O público desta vila da Ribeira Sacra puido achegarse na Casa da Cultura a ferramentas e estratexias para distinguir as noticias falsas e loitar contra elas.
O Colexio Profesional de Xornalistas de Galicia e Dano Cerebral Galicia organizan un Almorzo On/Off o vindeiro mércores 22 de xullo, Día Mundial do Cerebro, que baixo o título Que diferencia o dano cerebral adquirido doutras discapacidades? quere achegar as e os xornalistas ás especificidades do dano cerebral, así como dar a coñecer a súa dimensión social e os recursos disponíbeis. O encontro vai ter lugar ás 10:30 horas, na sede do Colexio de Xornalistas en Santiago de Compostela (Rúa Ponferrada, 9, baixo).
A Corporación de Servizos Audiovisuais de Galicia (CSAG) convoca unha proba para ampliar en dez persoas a listaxe de contratación temporal na categoría de redactor ou redactora.
O programa de alfabetización mediática posto en marcha na provincia de Lugo polo Colexio Profesional de Xornalistas de Galicia, coa subvención da Deputación de Lugo, recala esta semana en Quiroga. A Casa da Cultura deste concello da Ribeira Sacra vai acoller este xoves 16 ás 19:30 horas un obradoiro contra a desinformación, impartido pola xornalista Pilar Rodríguez Losada.
O Colexio Profesional de Xornalistas de Galicia organizou este xoves na Fonsagrada unha nova entrega dos obradoiros contra a desinformación na provincia de Lugo, organizados coa subvención da Deputación de Lugo. O taller de alfabetización mediática, deseñado para trasladar a poboación adulta coñecementos contra as mentiras e ferramentas para combatelas, estivo impartido por Pilar Rodríguez Losada.
A Bolsa ‘Nacho Mirás’ para proxectos xornalísticos, organizada e desenvolvida polo Colexio Profesional de Xornalistas de Galicia e patrocinada por Abanca, segue mantendo aberto até o 15 de setembro o prazo de recepción de candidaturas. Esta undécima edición, que conta tamén coa colaboración da Facultade de Ciencias da Comunicación da USC ten como novidade que está aberta a todos e todas as xornalistas, sen límite de idade, aínda que se seguirá valorando especialmente as propostas de estudantes de último curso ou persoas que acadaran o título nos últimos cinco anos.