Esta mañá, o alumnado do IES Camilo José Cela de Padrón recibiu a visita da xornalista Marga Tojo para achegarlles o primeiro de dous obradoiros contra a desinformación, dentro do programa posto en marcha polo Colexio Profesional de Xornalistas de Galicia, que chega aos institutos da Coruña grazas a un convenio asinado coa Deputación da Coruña. O centro acollerá un novo taller o vindeiro 24 de abril.

'Xornalistas no mercado', un programa de conversas informais entre profesionais da comunicación organizado pola demarcación da Coruña do Colexio Profesional de Xornalistas de Galicia, ten este sábado o seu primeiro encontro coas xornalistas Marta Otero, Fernanda Tabarés e María Yáñez. A charla terá lugar ás 12 do mediodía no primeiro andar mercado de San Agustín da cidade herculina. 

A Corporación Radio e Televisión de Galicia (CRTVG) convoca unha proba para ampliar en dez persoas a listaxe de contratación temporal na categoría de redactor ou redactora.

Os expertos e as expertas da xornada O impacto da intelixencia artificial no xornalismo: Riscos e oportunidades, organizada polo Colexio Profesional de Xornalistas de Galicia na Facultade de Ciencias da Comunicación de Santiago de Compostela, coincidiron este luns en defender a necesidade de compaxinar a inevitábel incorporación da intelixencia artificial na profesión coa deontoloxía e o xornalismo humano. O encontro contou co patrocinio da Secretaría Xeral de Medios da Xunta de Galicia e a colaboración da Facultade e do Colexio Profesional de Enxeñería en Informática de Galicia.

O Colexio Profesional de Xornalistas de Galicia organiza a partir das 9:00 deste luns 7 de abril a xornada O impacto da intelixencia artificial no xornalismo: Riscos e oportunidades, na Facultade de Ciencias da Comunicación de Santiago de Compostela. O encontro, que contará con expertos en IA como Ramón Salaverría ou Patricia Ventura, conta co patrocinio da Secretaría Xeral de Medios da Xunta de Galicia e a colaboración da Facultade e do Colexio Profesional de Enxeñería en Informática de Galicia. Aínda está aberta a inscrición gratuíta para a xornada, que se poderá seguir tamén por streaming. 

Os obradoiros contra a desinformación do Colexio Profesional de Xornalistas de Galicia recalaron onte nas localidades de Brión e Oroso, onde Marga Tojo e Cinthia Piñeiro, respectivamente, impartiron dous talleres deste programa de alfabetización mediática. Hoxe é a quenda do alumnado do IES de Carral, da man de Miguel Rodríguez, que mañá impartirá un novo taller no mesmo centro de ensino. Este programa desenvolvese en centros de ensino medio da Coruña grazas a un convenio asinado coa Deputación da Coruña, a través da área de Dereitos Civís.

Manuel Rico impartiu este martes o obradoiro Técnicas de investigación xornalística en tempos de IA, organizado polo grupo de investigación Novos Medios  da Facultade de Ciencias da Comunicación da USC, coa colaboración do Colexio Profesional de Xornalistas de Galicia. Ao longo de tres horas e ante unha sala repleta, o xornalista repasou as ferramentas dispoñíbeis para realizar xornalismo de investigación e defendeu o uso desta disciplina en todos os ámbitos da profesión. 

Os obradoiros contra a desinformación do Colexio Profesional de Xornalistas de Galicia chegaron hoxe ao IES Terra do Xallas de Santa Comba, con dous novos talleres impartidos polo xornalista Pedro Costa Manteiga. Estes obradoiros de alfabetización mediática están a desenvolverse en centros de ensino medio da Coruña grazas a un convenio asinado coa Deputación da Coruña, a través da área de Dereitos Civís liderada pola deputada Soledad Agra.