A presentación da XI Bolsa ‘Nacho Mirás’ vai celebrarse este xoves 23 de abril ás 11:00 na Aula de Visionado 1 da Facultade de Ciencias da Comunicación da Universidade de Santiago de Compostela (Avda. de Castelao s/n). A bolsa está organizada polo Colexio Profesional de Xornalistas de Galicia e patrocinada por Abanca, coa colaboración da Facultade.
O Liceo de Ourense acolleu este sábado 18 o encontro de xornalistas Informar desde o lume. Xornalismo e incendios forestais, organizado polo Colexio Profesional de Xornalistas de Galicia para reflexionar sobre a cobertura informativa dos lumes forestais e os cambios que implica a aparición dos incendios de sexta xeración. Miguel Cao, Uxía Carrera, Carlos García Hervella, Juan Maceiras e Santi M. Amil reivindicaron no debate o papel indispensable do xornalismo na información sobre incendios e destacaron o desafío que supuxo para a profesión a vaga de incendios do 2025.
Desde hoxe, xa pode escoitarse "Ondas da radio de Vigo", a segunda entrega de Poñer a voz, o podcast do Colexio de Xornalistas, realizado co apoio da Secretaría Xeral da Lingua da Xunta de Galicia e baixo a dirección de Lucía Junquera, que reivindica o labor de Begoña Caamaño como xornalista no cadro da celebración do Día das Letras Galegas.
A mesa redonda Informar desde o lume. Xornalismo e incendios forestais, organizada polo Colexio Profesional de Xornalistas de Galicia, reúne este sábado 18 de abril ás 12:00 a distintos profesionais con experiencia no tratamento informativo dos incendios. No acto, que se celebrará no Liceo de Ourense, participan Miguel Cao, Uxía Carrera, Carlos García Hervella, Juan Maceiras e Santi M. Amil, baixo a moderación de Jorge Isla.
O Concello de Pontevedra organiza este xoves 16 ás 19:00 na Casa das Campás unha mesa arredor das mulleres na comunicación que serve tamén de presentación na cidade do libro A Crónica Revelada: As precursoras do xornalismo galego, publicado polo Colexio de Xornalistas. No acto, encadrado na programacion da Primavera Feminista, van participar Ana Romaní, Tareixa Navaza e Pilar Fariña baixo a moderación de Natalia Puga.
O xornalista galego de elDiario.es José Precedo, que defendeu o dereito ao segredo xornalístico ante o Tribunal Supremo, é o gañador do XXII Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración do Concello de Pontevedra. Precedo recibirá o premio en Pontevedra o vindeiro sábado 9 de maio, nun acto que se celebrará na Casa Consistorial.
O anuncio da resolución da XXII edición do Premio Xornalistas de Liberdade de Prensa, organizado polo Colexio Profesional de Xornalistas de Galicia coa colaboración do Concello de Pontevedra, coñecerase este martes 14 de abril nunha conferencia de prensa na sala de prensa do Concello de Pontevedra (Rúa Michelena, 30, 2° andar) ás 11:00 horas.
O Colexio Profesional de Xornalistas de Galicia, xunto á Real Academia Galega de Belas Artes e a Facultade de Ciencias da Comunicación da Universidade de Santiago,organiza este luns 13 ás 10:00 a conferencia de Xosé Luis Suárez Canal Vida e obra de José Suárez, dentro da programación do Día das Artes Galegas deste ano. No acto, que se celebrará no Auditorio da Facultade, participarán tamén as decanas Belén Regueira Leal e Ana Isabel Rodríguez Vázquez e o fotoxornalista Xurxo Lobato.
No Ano das Letras de Begoña Caamaño, o Colexio Profesional de Xornalistas de Galicia reivindica a súa figura como xornalista cun podcast dirixido por Lucía Junquera, do que hoxe se estrea o primeiro episodio, e un encontro periodístico que se desenvolverá o vindeiro sábado 25 de abril na Casa das Máquinas de Santiago. Estes actos, agrupados baixo a denominación Poñer a voz, están realizados coa colaboración da Secretaría Xeral da Lingua da Xunta de Galicia.
O Liceo de Ourense vai acoller o vindeiro sábado 18 de abril ás 12:00 a mesa redonda Informar desde o lume. Xornalismo e incendios forestais, organizada polo Colexio Profesional de Xornalistas de Galicia, na que xornalistas de distintos medios van compartir as súas experiencias e opinións arredor da cobertura informativa dos lumes.