O acto de entrega do XXII Premio Xornalistas de Liberdade de Prensa a José Precedo, organizado polo Colexio Profesional de Xornalistas de Galicia coa colaboración do Concello de Pontevedra, vai ter lugar a partir das 12:00 deste sábado na Casa Consistorial de Pontevedra (Praza de España, 1). Precedo, xornalista galego de elDiario.es, defendeu o pasado novembro o dereito ao segredo xornalístico ante o Tribunal Supremo, no cadro do proceso ao Fiscal Xeral do Estado.

Desde hoxe, xa está no aire "Cambiar de xogo", o cuarto capítulo de Poñer a voz, o podcast do Colexio de Xornalistas sobre Begoña Caamaño, realizado co apoio da Secretaría Xeral da Lingua da Xunta de Galicia e baixo a dirección de Lucía Junquera. Neste episodio asistimos ao espertar da conciencia feminista de Begoña Caamaño, e tamén á súa loita polos medios públicos. 

A Movida, revista dixital de cultura e ocio de Vigo, busca un ou unha xornalista para incorporarse inmediatamente á súa redacción cunha bolsa de prácticas de catro meses de duración, de xuño a outubro.

Ás 14.00 horas do martes 12 de maio remata o prazo para presentar candidaturas á sexta edición do premio 'Somos Esenciais', convocado polo Colexio Profesional de Xornalistas de Galicia, coa colaboración de Gadis, que premia traballos xornalísticos de temática social publicados ou emitidos en Galicia no 2025.

A Casa das Máquinas de Santiago acolleu este sábado 25 de abril a xornada Poñer a voz, un encontro celebrado polo Colexio Profesional de Xornalistas de Galicia, coa colaboración da Secretaría Xeral da Lingua, para reivindicar o traballo xornalístico de Begoña Caamaño, a homenaxeada este ano o Día das Letras Galegas, ao tempo que se reflexiona sobre a situación presente e pasada da profesión. Organizado baixo a programa de radio ao vivo, presentado por Mónica Rosas, membro da Xunta de Goberno do Colexio de Xornalistas e redactora dos Servizos Informativos da CSAG, a ocasión xuntou máis de sesenta persoas, a meirande parte delas comunicadoras de distintas xeracións, que se reuniron para lembrar a figura dunha xornalista profesional, xenerosa e comprometida.

A imaxe que se entregará a José Precedo o vindeiro 9 de maio como símbolo do XXII Premio Xornalistas de Liberdade de Prensa é unha fotografía de 2002 da viguesa Mercedes Moralejo que mostra a recollida do chapapote do Prestige por parte das mariscadoras de Baiona. A instantánea salienta o papel da sociedade civil e as mulleres, ademais de simbolizar a importancia do xornalismo mediante a figura dun cámara de televisión. 

O Colexio Profesional de Xornalistas de Galicia, coa colaboración da Secretaría Xeral da Lingua, organiza este sábado 25 de abril unha xornada arredor do labor xornalístico de Begoña Caamaño, que se desenvolverá a partir das 12:00 na Casa das Máquinas de Santiago de Compostela. O encontro, de entrada libre e gratuíta e organizado baixo a forma dun programa de radio, estará conducido por Mónica Rosas e reunirá a profesionais que traballaron coa homenaxeada no Día das Letras, alén doutras xeracións de xornalistas e a actuación musical de Uxía. Esta semana. ademais, publicouse a terceira entrega do podcast homónimo dedicado a Caamaño, "Unha radio para un país".

Esta mañá presentouse en Santiago a XI Bolsa ‘Nacho Mirás’ para proxectos xornalísticos, organizada e desenvolvida polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da USC. A esta nova edición, que ten aberta a recepción de propostas até o 15 de setembro, pódense presentar todos e todas as xornalistas, aínda que se seguirá valorando especialmente as propostas de estudantes de último curso ou persoas que acadaran o título nos últimos cinco anos. 

Este xoves publícase o terceiro capítulo, de Poñer a voz, o podcast do Colexio de Xornalistas, realizado co apoio da Secretaría Xeral da Lingua da Xunta de Galicia e baixo a dirección de Lucía Junquera, que lembra a faceta xornalística de Begoña Caamaño no cadro do Día das Letras Galegas.  "Unha radio para un país", relata a súa chegada aos micrófonos da Radio Galega.

A presentación da XI Bolsa ‘Nacho Mirás’ vai celebrarse este xoves 23 de abril ás 11:00 na Aula de Visionado 1 da Facultade de Ciencias da Comunicación da Universidade de Santiago de Compostela (Avda. de Castelao s/n). A bolsa está organizada polo Colexio Profesional de Xornalistas de Galicia e patrocinada por Abanca, coa colaboración da Facultade.