O foro participativo Un país coa súa lingua, impulsado polo Consello da Cultura Galega e que contou coa participación de Ana González Liste en representación do Colexio de Xornalistas, vén de publicar o seu informe de conclusións con propostas para revitalizar o uso do galego. No que fai ao ámbito xornalístico, o documento alerta dun "compromiso desigual dos medios de comunicación" e propón unha serie de medidas a curto e medio prazo, encabezadas polo reforzo dos requisitos lingüísticos nas axudas a medios. 

O Colexio Profesional de Xornalistas de Galicia, coa colaboración de Gadis, organiza o vindeiro martes 21 de outubro o Encontro de Xornalismo Social "Somos Esenciais" para reflexionar sobre a información que dá voz aos problemas da sociedade e se pon ao servizo da cidadanía. O acto, gratuíto e aberto para todo tipo de público, celebrarase a partir das 19.00 horas no salón de actos do Marco de Vigo (Rúa do Príncipe, 54) e contará coa presenza de Lara Graña Prieto, gañadora do V Premio de Xornalismo Somos Esenciais, así como da premiada e os finalistas das dúas últimas edicións do certame.

Mentres se negocia un posíbel acordo de paz, os dous anos de ofensiva israelí na Faixa de Gaza colocan nunha situación moi delicada a defensa da liberdade de prensa a nivel internacional. Aos numerosos ataques contra informadores, que provocaron máis de 250 mortos, súmanse a censura, a prohibición de entrada á prensa internacional ou o secuestro de xornalistas en augas internacionais, nunha loita polo control da narrativa que xustifica de maneira intolerábel utilizar a profesionais da comunicación como obxectivos. 

O Colexio Profesional de Xornalistas de Galicia pon a disposición, de maneira gratuíta, tres webinars máis dos accesíbeis a través da súa plataforma de formación online. As colexiadas e colexiados poderán formarse así de balde en cuestións como a actualidade xudicial, o tratamento da información relativa a menores ou o xornalismo de datos. 

As Recomendacións para profesionais dos medios de comunicación ao informar sobre a conduta suicida, presentadas hoxe, recollen pautas para realizar un tratamento responsábel da conduta suicida que sirva tamén para contribuír á súa prevención. O documento está realizado polo Colexio Profesional de Xornalistas e a Xunta de Galicia, a partir dun grupo de traballo no que participaron xornalistas, profesionais da saúde mental e membros da Consellería de Sanidade e da Facultade de Ciencias da Comunicación da USC.

Ana Pardo, Xosé Cuns e Clara de Vega presentaron este mércores na sede do Colexio de Xornalistas a campaña #OrgulloTerceiroSector, coa que a EAPN Galicia - Rede Europea contra a Pobreza e a Exclusión Social quere desmontar os prexuízos sobre o traballo das entidades sociais e pór en valor a súa contribución á transformación social. O acto contou coa introdución de Manuel Rey, membro da Xunta de Goberno do Colexio Profesional de Xornalistas de Galicia.

Desde hoxe, mércores 1 de outubro, o Colexio Profesional de Xornalistas de Galicia regresa ao horario de inverno, segundo estipula o convenio de Despachos e Oficinas da provincia de A Coruña. O CPXG estará aberto en horario de maña das 9.00 ás 14.30 de luns a xoves e das 08.00 ás 15.00 horas os venres, e polas tardes das 16.00 ás 18:00 os luns e mércores e das 16:00 ás 19.00 horas os martes e xoves.

A Corporación de Servizos Audiovisuais de Galicia (CSAG) abre convocatoria dunha proba selectiva para a formalización dun contrato de traballo formativo para a obtención da práctica profesional na categoría de locutor ou locutora de radio.  

O Colexio Profesional de Xornalistas de Galicia e EAPN Galicia - Rede Europea contra a Pobreza e a Exclusión Social organizan un Almorzo On/Off este mércores 1 de outubro para presentar a campaña #OrgulloTerceiroSector, coa que se reivindica o labor destas entidades como un dos axentes fundamentais na transformación social e na prestación de servizos sociais, acceso ao emprego ou a vivenda.

Lara Graña, gañadora do V Premio de Xornalismo Somos Esenciais organizado polo Colexio Profesional de Xornalistas de Galicia en colaboración con Gadis, e Ángel Paniagua, finalista, recolleron esta mañá os seus galardóns na sede do Colexio Profesional de Xornalistas de Galicia en Santiago, nun acto que se converteu nunha reivindicación da posibilidade da profesión para cambiar a sociedade.