O Colexio Profesional de Xornalistas de Galicia, coa colaboración da Secretaría Xeral da Lingua, organiza este sábado 25 de abril unha xornada arredor do labor xornalístico de Begoña Caamaño, que se desenvolverá a partir das 12:00 na Casa das Máquinas de Santiago de Compostela. O encontro, de entrada libre e gratuíta e organizado baixo a forma dun programa de radio, estará conducido por Mónica Rosas e reunirá a profesionais que traballaron coa homenaxeada no Día das Letras, alén doutras xeracións de xornalistas e a actuación musical de Uxía. Esta semana. ademais, publicouse a terceira entrega do podcast homónimo dedicado a Caamaño, "Unha radio para un país".

Esta mañá presentouse en Santiago a XI Bolsa ‘Nacho Mirás’ para proxectos xornalísticos, organizada e desenvolvida polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da USC. A esta nova edición, que ten aberta a recepción de propostas até o 15 de setembro, pódense presentar todos e todas as xornalistas, aínda que se seguirá valorando especialmente as propostas de estudantes de último curso ou persoas que acadaran o título nos últimos cinco anos. 

Este xoves publícase o terceiro capítulo, de Poñer a voz, o podcast do Colexio de Xornalistas, realizado co apoio da Secretaría Xeral da Lingua da Xunta de Galicia e baixo a dirección de Lucía Junquera, que lembra a faceta xornalística de Begoña Caamaño no cadro do Día das Letras Galegas.  "Unha radio para un país", relata a súa chegada aos micrófonos da Radio Galega.

A presentación da XI Bolsa ‘Nacho Mirás’ vai celebrarse este xoves 23 de abril ás 11:00 na Aula de Visionado 1 da Facultade de Ciencias da Comunicación da Universidade de Santiago de Compostela (Avda. de Castelao s/n). A bolsa está organizada polo Colexio Profesional de Xornalistas de Galicia e patrocinada por Abanca, coa colaboración da Facultade. 

O Liceo de Ourense acolleu este sábado 18 o encontro de xornalistas Informar desde o lume. Xornalismo e incendios forestais, organizado polo Colexio Profesional de Xornalistas de Galicia para reflexionar sobre a cobertura informativa dos lumes forestais e os cambios que implica a aparición dos incendios de sexta xeración. Miguel Cao, Uxía Carrera, Carlos García Hervella, Juan Maceiras e Santi M. Amil reivindicaron no debate o papel indispensable do xornalismo na información sobre incendios e destacaron o desafío que supuxo para a profesión a vaga de incendios do 2025. 

Desde hoxe, xa pode escoitarse "Ondas da radio de Vigo", a segunda entrega de Poñer a voz, o podcast do Colexio de Xornalistas, realizado co apoio da Secretaría Xeral da Lingua da Xunta de Galicia e baixo a dirección de Lucía Junquera, que reivindica o labor de Begoña Caamaño como xornalista no cadro da celebración do Día das Letras Galegas. 

A mesa redonda Informar desde o lume. Xornalismo e incendios forestais, organizada polo Colexio Profesional de Xornalistas de Galicia, reúne este sábado 18 de abril ás 12:00 a distintos profesionais con experiencia no tratamento informativo dos incendios. No acto, que se celebrará no Liceo de Ourense, participan Miguel Cao, Uxía Carrera, Carlos García Hervella, Juan Maceiras e Santi M. Amil, baixo a moderación de Jorge Isla. 

O Concello de Pontevedra organiza este xoves 16 ás 19:00 na Casa das Campás unha mesa arredor das mulleres na comunicación que serve tamén de presentación na cidade do libro A Crónica Revelada: As precursoras do xornalismo galego, publicado polo Colexio de Xornalistas. No acto, encadrado na programacion da Primavera Feminista, van participar Ana Romaní, Tareixa Navaza e Pilar Fariña baixo a moderación de Natalia Puga.

O xornalista galego de elDiario.es José Precedo, que defendeu o dereito ao segredo xornalístico ante o Tribunal Supremo, é o gañador do XXII Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración do Concello de Pontevedra. Precedo recibirá o premio en Pontevedra o vindeiro sábado 9 de maio, nun acto que se celebrará na Casa Consistorial. 

O anuncio da resolución da XXII edición do Premio Xornalistas de Liberdade de Prensa, organizado polo Colexio Profesional de Xornalistas de Galicia coa colaboración do Concello de Pontevedra, coñecerase este martes 14 de abril nunha conferencia de prensa na sala de prensa do Concello de Pontevedra (Rúa Michelena, 30, 2° andar) ás 11:00 horas.