A Plataforma en Defensa da Liberdade de Información (PDLI) vén de presentar o seu informe La libertad de información en España, correspondente ao ano 2025, no que se constata que aínda, que a nivel xeral, "se garante o pluralismo e a liberdade dos medios", continúan a existir "ameazas persistentes" contra o exercicio do xornalismo, entre as que salientan a seguranza dos e das profesionais, o incremento das presións políticas e económicas, a utilización de demandas SLAPP, as dificultades de acceso á información pública, a elevada concentración da propiedade dos medios e novas formas de censura ou restricións dixitais. Desde a PDLI advírtese que o risco non está só na existencia de incidentes illados, senón especialmente na súa normalización, que deteriora progresivamente a liberdade de información. 

O estudo documenta unha serie de agresións físicas, ameazas contra xornalistas, ataques durante a cobertura de manifestacións, e episodios de intimidación, tanto desde actores privados como desde cargos públicos. Entre eles destaca especialmente a imputación de varios xornalistas por publicar un informe policial relacionado coa causa contra o daquela Fiscal Xeral do Estado. Constata tamén o relatorio un aumento de comparecencias institucionais sen quenda de preguntas, os adiamentos reiterados no acceso á información pública e a ausencia de avances na reforma do réxime de segredos oficiais. Por último, detalla varias reformas e proxectos normativos que teñen impacto sobre a liberdade de prensa: o Anteproxecto de Lei de Gobernanza Democrática en Servizos Dixitais e Medios de Comunicación, a reforma do dereito de rectificación no entorno dixital, o Anteproxecto de Lei Orgánica do Segredo Profesional dos xornalistas e o Proxecto de Lei de Información Clasificada.

De cara a este ano 2026, a PDLI apunta algúns factores clave que poden marcar a evolución da liberdade de información a nivel estatal: a tramitación e aprobación das reformas lexislativas pendentes, a aplicación efectiva do Regulamento Europeo de Liberdade dos Medios (EMFA) e do Regulamento de Servizos Dixitais (DSA), a transposición da Directiva europea contra as demandas SLAPP, a evolución do acceso á información pública y da transparencia institucional, o aumento do acoso dixital e da polarización política e as garantías de pluralismo e independencia dos medios públicos.

Finalmente, o informe recolle unha serie de recomendacións para os poderes lexislativos e as administracións públicas, entre as que se encontran reforzar o segredo profesional limitando estrictamente as súas excepcións; garantir que a lei de información clasificada incorpore prazos razoábeis e mecanismos independentes de revisión, evitar o uso discrecional de sancións que poidan restrinxir el acceso dos medios aos parlamentos; asegurar que a regulación do entorno dixital respecte plenamente a liberdade de información e o control judicial e protexer activamente os e as xornalistas fronte a agresións, acoso e presións xudiciais.

CPXG