O encontro vai ter lugar ás 10:00 horas, na sede do Colexio de Xornalistas en Santiago de Compostela (Rúa Ponferrada, 9, baixo) e será aberto e gratuíto para os e as xornalistas interesadas. Por motivos de organización, para poder asistir é imprescindible inscribirse enviando un mail a xornalistas@xornalistas.gal ou chamando ó 981 93 56 70. Aforo limitado.

O acto vai contar coa participación de Manuel Rey, membro da Xunta de Goberno do Colexio Profesional de Xornalistas de Galicia; Ana Pardo, presidenta da EAPN Galicia; Xosé Cuns, director da EAPN Galicia e Clara de Vega, responsable de comunicación da EAPN Galicia.

O terceiro sector: xerador de emprego e riqueza

Cara ás entidades que conforman o Terceiro Sector persiste na actualidade un escaso coñecemento, así como prexuízos sobre o traballo que desenvolven. A isto engádese o feito de non consideralo como un axente económico esencial que crea emprego e riqueza. Resultado desta idea son as discriminacións nalgunhas convocatorias, nas que non se ten en conta as características das entidades sociais e os perfís cos que se traballa.

Fronte a este escenario, a campaña #OrgulloTerceiroSector pretende derrubar algúns dos mitos, amosando o labor das entidades participantes como un axente máis do sistema de servizos sociais, de emprego, acceso a vivenda, sanidade, etc. Caracterízanse por unha atención individualizada e integral, poñendo o foco na persoa, respectando tempos de intervención e as súas casuísticas.

CPXG