Elahe Mohammadi, premiada este ano co XX Premio José Couso de Liberdade de Prensa xunto a Nilufar Hamedi, púxose en contacto co Colexio Profesional de Xornalistas de Galicia e o Club de Prensa de Ferrol, organizadores do galardón, malia á súa dificil situación en Irán. Nunha mensaxe, recibida con posterioridade á celebración da entrega do premio o pasado venres, a xornalista iraniana declara sentirse "realmente honrada e orgullosa de ter sido elixida" para recibir o galardón, ao tempo que expresa as súas condolencias por José Couso, "o valente xornalista español que hai vinte e un anos perdeu traxicamente a vida en Bagdad"

Mohammadi trasmite a súa vontade de dedicar o premio, no seu nome e como unha das galardoadas, ao finalista Pablo González, encarcerado en Polonia, asegurando que os seus pensamentos "están con el nestes momentos difíciles". Así mesmo, estende tamén o recoñecemeno "a Wael al-Dahdouh e a todos os xornalistas palestinos que fixeron grandes sacrificios para chamar a atención sobre a situación en Gaza".

Finalmente, a comunicadora expresa a súa esperanza "nun mundo onde os xornalistas poidan traballar con seguridade e liberdade, especialmente aqueles que informan con valentía sobre a opresión e se negan a ser silenciados" e solicita que se traslade tamén á súa mensaxe "á estimada familia de José Couso".

O premio internacional de liberdade de prensa, organizado polo Colexio de Xornalistas e o Club de Prensa de Ferrol, cumpriu este ano a súa vixésima edición, a última na que levará o nome do camarógrafo ferrolán asasinado no Hotel Palestina.

CPXG