O xurado do quinto Premio de Xornalismo 'Somos Esenciais', composto por Alexandra Kuntz Peiteado e Fátima Carmena Mayorga, Alba Chao Vázquez, Lara Dopazo Ruibal, Francisco X. González Sarria, Darío Janeiro Pereira, Belén Regueira Leal, Ana Isabel Rodriguez Vazquez e Cristina de la Vega Jiménez, decidiu por unanimidade o pasado martes 1 de xullo escoller como merecedor do galardón, dotado con 2.000 euros, o traballo de Lara Graña Prieto «"García del Cid", el buque de luto y cólera», publicado no Faro de Vigo o 15 de setembro de 2024. 

Os membros do xurado quixeron destacar "o traballo de investigación realizado pola autora, co seguimento exhaustivo dun tema descoñecido para o gran público", que finalmente tivo unha repercusión a nivel estatal. Na acta da resolución deixase constancia de que esta reportaxe é un exemplo destacado de investigación xornalística "pola gran cantidade de documentación e de fontes manexadas pola xornalista", para rematar salientando que “Lara Graña representa, con esta peza, o espírito do galardón, cun xornalismo vivo e útil para a sociedade”.

No transcurso da xuntanza, acordouse conceder tamén unha mención especial como finalista a Ángel Paniagua pola reportaxe «La vida tras el suicidio de una hija: "Esto le puede pasar a cualquiera"», publicada en La Voz de Galicia o 28 de xaneiro de 2024. Deste traballo o xurado destacou “o tratamento coidadoso e profesional dun tema delicado, fuxindo dos estereotipos e da estigmatización que adoitan rodear ao suicidio”.

Os membros do xurado sinalaron a alta calidade dos traballos presentados, que cun total de 25 propostas correspondentes a traballos de prensa, radio, televisión, fotografía e xornalismo dixital "confirman a necesidade de manter nos medios un espazo para a información social de calidade que achegue distintas realidades coa mirada analítica, crítica e contrastada do xornalismo".

A organización realizará un acto de entrega do premio nunha data aínda por concretar. Ademais, como novidade nesta edición, o certame vaise completar coa celebración, no último trimestre do ano, dun seminario no que se pretende reflexionar sobre o papel esencial do xornalismo social en Galicia e o seu impacto na comunidade, así como recoñecer o labor de xornalistas que traballan en temas de interese social en Galicia. O seminario, que será de asistencia gratuíta, vén a reforzar a mensaxe do Premio "Somos Esenciais”, e pretende ser un punto de encontro entre xornalistas e entidades do terceiro sector. Do acto de entrega e do seminario proporcionarase máis información proximamente polas canles habituais de comunicación do Colexio.

Premio Somos Esenciais 

O Premio de Xornalismo Somos Esenciais, organizado polo Colexio Profesional de Xornalistas de Galicia, corporación de dereito público que representa aos xornalistas galegos, coa colaboración con Gadis, recoñece o labor dos e das profesionais da comunicación e a información social como vehículo condutor entre o que pasa na sociedade e a cidadanía, dando voz aos problemas dos axentes sociais e aos efectos que causan. 

Na primeira edición do Premio 'Somos Esenciais' resultou gañadora Isabel Bravo co traballo «Cando as preguntas aínda non tiñan resposta», emitido na Radio Coruña - Cadena SER, e finalista a reportaxe «La uci del covid, desde dentro: "No somos héroes"», publicada por Ángel Paniagua en La Voz de Galicia. Na segunda edición, o gañador foi Manuel Rey Pan, polo podcast de GCiencia «O ano da pandemia». O equipo formado por Elena Martín Lores, Pablo Santiago Martínez, Sofía Caamaño Deus e Ruben Alexandre Lopes Martins recibiu tamén unha mención especial como finalistas pola reportaxe «Pechar a fronteira foi como pechar a fiestra da casa», publicada no dixital Xarda e no xornal portugués Público. Gemma Malvido e Vanessa Casteleiro foron as gañadoras da edición de 2022 pola serie de reportaxes en La Opinión A Coruña «Una tarde en Teixeiro: "¿Se porta bien?"», «Con ganas de salir adelante» e «Una mañana en Teixeiro: Deporte, trabajo, estudio y manualidades para volver a la calle»; con María de La Huerta, como finalista coa peza «Suicidio de mayores, un drama silenciado», publicada no mesmo xornal. O ano pasado,  Alba Chao, xornalista de Faro de Vigo, foi recoñecida como gañadora pola reportaxe «Pornografía en la red, la mayor escuela de desigualdad y misoginia», mentres que Carolina Sertal resultou finalista co traballo «Bebés roubados, entre o silencio e a impunidade», publicado en Luzes. 

CPXG