Este martes 23 de setembro ás 10.30 horas vai ter lugar, na sede do Colexio Profesional de Xornalistas de Galicia en Santiago (Rúa Ponferrada, 9, baixo), o acto de entrega do V Premio de Xornalismo 'Somos Esenciais' a Lara Graña, nun acto que contará tamén coa presenza da decana do Colexio de Xornalistas, Belén Regueira Leal, e de María Eimil Méndez, representante de Comunicación de Gadisa. Entregarase tamén a mención de honra desta edición a Ángel Paniagua. 

Lara Graña foi a gañadora desta quinta edición do premio pola reportaxe «"García del Cid", el buque de luto y cólera», publicada no Faro de Vigo o 15 de setembro de 2024, da qu o xurado destacou "o traballo de investigación realizado pola autora, co seguimento exhaustivo dun tema descoñecido para o gran público" e a "gran cantidade de documentación e de fontes manexadas pola xornalista". Concedeuse tamén a mención especial como finalista a Ángel Paniagua pola reportaxe «La vida tras el suicidio de una hija: "Esto le puede pasar a cualquiera"», publicada en La Voz de Galicia o 28 de xaneiro de 2024, polo “tratamento coidadoso e profesional dun tema delicado, fuxindo dos estereotipos e da estigmatización que adoitan rodear ao suicidio”.

O xurado do quinto Premio de Xornalismo 'Somos Esenciais' estivo composto por Alexandra Kuntz Peiteado e Fátima Carmena Mayorga, Alba Chao Vázquez, Lara Dopazo Ruibal, Francisco X. González Sarria, Darío Janeiro Pereira, Belén Regueira Leal, Ana Isabel Rodriguez Vazquez e Cristina de la Vega Jiménez.

Premio de Xornalismo Somos Esenciais

O Premio de Xornalismo Somos Esenciais, organizado polo Colexio Profesional de Xornalistas de Galicia, corporación de dereito público que representa aos xornalistas galegos, coa colaboración con Gadis, recoñece o labor dos e das profesionais da comunicación e a información social como vehículo condutor entre o que pasa na sociedade e a cidadanía, dando voz aos problemas dos axentes sociais e aos efectos que causan. 

Na primeira edición do Premio 'Somos Esenciais' resultou gañadora Isabel Bravo co traballo «Cando as preguntas aínda non tiñan resposta», emitido na Radio Coruña - Cadena SER, e finalista a reportaxe «La uci del covid, desde dentro: "No somos héroes"», publicada por Ángel Paniagua en La Voz de Galicia. Na segunda edición, o gañador foi Manuel Rey Pan, polo podcast de GCiencia «O ano da pandemia». O equipo formado por Elena Martín Lores, Pablo Santiago Martínez, Sofía Caamaño Deus e Ruben Alexandre Lopes Martins recibiu tamén unha mención especial como finalistas pola reportaxe «Pechar a fronteira foi como pechar a fiestra da casa», publicada no dixital Xarda e no xornal portugués Público. Gemma Malvido e Vanessa Casteleiro foron as gañadoras da edición de 2022 pola serie de reportaxes en La Opinión A Coruña «Una tarde en Teixeiro: "¿Se porta bien?"», «Con ganas de salir adelante» e «Una mañana en Teixeiro: Deporte, trabajo, estudio y manualidades para volver a la calle»; con María de La Huerta, como finalista coa peza «Suicidio de mayores, un drama silenciado», publicada no mesmo xornal. O ano pasado,  Alba Chao, xornalista de Faro de Vigo, foi recoñecida como gañadora pola reportaxe «Pornografía en la red, la mayor escuela de desigualdad y misoginia», mentres que Carolina Sertal resultou finalista co traballo «Bebés roubados, entre o silencio e a impunidade», publicado en Luzes.