O 25 de xullo de 1971, coincidindo co ano xacobeo, inaugurábase en Santiago de Compostela o Centro Territorial da Radiotelevisión Española en Galicia. O centro, que primeiro estivo situado nun piso da zona vella compostelá e máis tarde no Pazo de Raxoi, funcionou primeiro como unha delegación dos informativos estatais, pero en 1974 xa comezou as desconexións coa emisión de Panorama de Galicia, o que despois se convertiría no Telexornal. En 1991 inaugúranse as instalacións de San Marcos, onde o centro ten actualmente a súa sede. Ao longo destas cinco décadas, as cámaras e os micrófonos do Centro da RTVE en Galicia foron rexistrando numerosos momentos clave da historia informativa e audiovisual na nosa comunidade.

Con motivo deste 50 aniversario, RTVE realizará unha programación conmemorativa coa emisión dos seus informativos desde catro escenarios distintos (os exteriores do Centro Territorial, a Cidade da Cultura, o Parque da Alameda e a Praza do Obradoiro) e unha serie de contidos que se inician hoxe cunha entrevista ao presidente da Xunta de Galicia, Alberto Núñez Feijoo. Ademais, o xoves 22 emitirase un programa especial, dunha hora de duración, coa participación de Tareixa Navaza e Xoán Barro, dous rostros históricos da canle que acompañarán a Ana Zas presentando o Telexornal. Os programas queren tamén pór en valor o Arquivo da RTVE, recuperando exemplos do material galego atesourado polo centro. 

A Xunta de Goberno do Colexio Profesional de Xornalistas de Galicia quere expresar os parabéns pola efeméride ao Centro Territorial e ao conxunto de profesionais da Radiotelevisión Española en Galicia. O seu traballo durante estas cinco décadas foi un exemplo de profesionalidade e xornalismo, e a súa contribución é esencial para a pluralidade do panorama mediático galego. 

CPXG