A Xunta de Goberno do Colexio Profesional de Xornalistas de Galicia, no nome de toda a profesión, recibe con tristura a nova do falecemento da colexiada María Xesús Arias, Pitusa, o pasado venres 9, e traslada as súas condolencias á familia e achegados.

María Xesús Arias Rei, Pitusa, nada hai 65 anos, levaba desde 1984 vinculada á radio municipal, desde Radio Fene, onde foi unha das voces dos informativos e do programa A Fenestra. O seu labor informativo desenvolveuse tamén nas páxinas de A Nosa Terra, onde foi colaboradora desde Ferrolterra durante moitos anos. Investigadora do cinema e da historia local, asinou libros como O cine na comarca de Ferrol, as súa xentes, os seus recursos (1897-2010), Maniños no Pasado, Barallobre no Pasado, Perlío no Pasado ou Fene vai de Antroido. Destaca tamén o seu papel na banda deseñada galega e como realizadora da curtametraxe Vivir no Adriano, así como o seu activismo democrático e en defensa dos dereitos das mulleres.

A Xunta de Goberno do Colexio Profesional de Xornalistas de Galicia quere expresar o seu pesar polo seu falecemento e trasladar o pésame a toda a familia e as persoas achegadas.

Xunta de Goberno
Colexio Profesional de Xornalistas de Galicia