Con estas conversas entre profesionais da información cultural quérese reivindicar a importancia desta área de especialización e fornecer un espazo de reflexión profesional sobre o contexto no que se exerce actualmente. Para promover o debate sobre a situación actual da información sobre cultura e os desafíos aos que se enfronta, o Colexio Profesional de Xornalistas de Galicia, o Concello de Pontevedra e o Culturgal organizan un Encontro de xornalismo cultural, que terá lugar o vindeiro sábado 29 de novembro, a partir das 11:00 horas, na Sala VIP do Pazo da Cultura de Pontevedra (Rúa de Alexandre Bóveda, s/n), no marco da programación de Culturgal.

O encontro vai comezar coa mesa redonda "Presente e futuro do xornalismo cultural", na que se reflexionará sobre o percorrido desta temática xornalística como área de especialización informativa: da súa presenza nos medios tradicionais aos novos formatos de comunicación e o seu papel na mediación e prescrición cultural. No debate van participar Marta Gómez, xornalista de RNE e directora do programa Zig Zag da TVG do 2018 ao 2025; Ana G. Liste, xornalista de Praza e Vinte; Tamara Montero, xornalista de La Voz de Galicia e Ramón Rozas, xornalista do Diario de Pontevedra. Moderará a sesión Iolanda F. Casal, membro do pleno territorial do Colexio de Xornalistas. 

Ao remate da primeira mesa realizarase unha pausa, tras a que regresará o programa co debate "Xornalismo e comunicación cultural: sinerxias e malentendidos", no que profesionais dos medios e da comunicación das entidades e eventos culturais conversarán sobre cal é a relación coas fontes neste ámbito. Baixo a moderación de Carme D. Prol, membro do pleno territorial do Colexio de Xornalistas, participarán nesta mesa redonda a periodista e comunicadora cultural Sandra Carnota; Sonia Díaz, comunicadora cultural e docente e titora de comunicación no CEU en xestión e innovación cultural da USC; Alejandro Espiño, xornalista de Pontevedra Viva e Susana Regueira, xornalista de Faro de Vigo.

CPXG