Con motivo da celebración, este mércores 5 de xuño, do Día Mundial do Medio Ambiente, a rede internacional de xornalistas ambientais Earth Journalism Network fixo público o seu informe Cubrir o planeta: avaliación o estado do xornalismo climático e ambiental a nivel mundial, realizado pola profesora Gabi Mocatta, da australiana Deakin University, que recolleu información de 744 xornalistas e editores en 102 países distintos, ademais de realizar entrevistas extensas a 74 deles. 

A enquisa global revela que o 39% das e dos xornalistas ambientais recibiron ameazas "ás veces" ou "con frecuencia", e unha porcentaxe semellante se autocensurou á hora de informar sobre cuestións climáticas ou relacionadas co medio. A meirande parte dos presións viñan de parte de persoas implicadas en actividades ilegais como a explotación forestal ou a minaría, mentres que un 30% das ameazas foron con accións legais, o que reflicte unha tendencia crecente ao uso do sistema xudicial para amordazar a liberdade de expresión. O 11% recibiron ataques contra a súa integridade física. 

O estudio mostra tamén que case todas as persoas enquisadas (82%) ven un aumento da relevancia da información ambiental dentro da axenda mediática, mais nas enquisas moitos xornalistas repiten que a presenza do cambio climático nos medios segue a ser menor que a que merece un problema desta magnitude. Outros temas que reflicten como claves son a deforestación, o acceso á auga e saneamento, a contaminación da auga, as políticas gobernamentais e a polución por plásticos. Os e as comunicadoras ambientais ven tamén unha presenza crecente da desinformación sobre o medio, e propoñen algunhas medidas para mellorar a cobertura destas temáticas: máis financiamento para o xornalismo de investigación (79%); máis formación (75%); bolsas para asistir a conferencias e congresos (72%); máis acceso a datos relevantes (67%) e mellores contactos cos expertos (60%).

O aumento das presións e ameazas contra o xornalismo ambiental é unha cuestión que se vén denunciando na profesión desde hai xa algúns anos. Hai uns meses alertábase que a metade das e dos informadores asasinados na India durante a última década estaban a cubrir cuestións relacionadas co medio, nun exemplo de como esta especialidade do xornalismo é cada vez máis perigosa. 

CPXG