Unha vintena de colexiados e colexiadas formouse este sábado 31 de xaneiro en alfabetización mediática no edificio Cersia de Santiago de Compostela, nunha nova xornada de formación organizada polo Colexio Profesional de Xornalistas de Galicia. O contido do curso estivo dirixido, ademais de a tratar os fundamentos básicos do fenómeno da desinformación e a alfabetización mediática, a fornecer de recursos docentes para achegar estes temas dunha mellor maneira ao público de todas as idades.

A formación estivo impartida por Vivian Rangel, xornalista especializada en alfabetización mediática cun mestrado en Xornalismo e Comunicación Dixital: Datos e Novas Narrativas da Universitat Oberta de Catalunya. Foi profesora de literatura e cultura na Universidade de Santiago de Compostela durante case cinco anos e actualmente loita contra a desinformación desenvolvendo estratexias educativas para fortalecer o pensamento crítico e a alfabetización mediática en Maldita Educa.

Esta xornada de formación é unha continuación da que xa se realizou no ano 2024 e está destinada a dotar de docentes os proxectos de alfabetización mediática organizados polo Colexio Profesional de Xornalistas de Galicia. As persoas participantes que así o desexen pasarán a formar parte dunha bolsa de traballo do Colexio para impartir talleres sobre desinformación en galego, de maneira remunerada. Neste ano xa se está a traballar no desenvolvemento de obradoiros nas provincias da Coruña e Lugo.

CPXG