Continúan desenvolvéndose nos centros educativos galegos os obradoiros Xornalismo na Escola, unha iniciativa do Colexio de Xornalistas de Galicia e da Obra Social La Caixa que vai pola súa III edición. O programa didáctico achegará a vindeira semana o mundo do xornalismo ao alumnado do IES Daviña Rey de Monforte, o CPI Toural de Vilaboa, o IES de Porto do Son, o IES As Bizocas do Grove e o IES Lucus Augusti de Lugo. Así, o programa da vindeira semana de obradoiros é o seguinte: 

• Mércores 4 no IES de Porto do Son, ás 8:20, ás 10:20 e ás 12:00. Imparte os obradoiros Rosa María Bueno Crego. 
• Mércores 4 no CPI Toural de Vilaboa, ás 9:30 e ás 11:30. Imparte os obradoiros Paula Méndez Casais. 
• Mércores 4 no IES Daviña Rey de Monforte, ás 12:35 e ás 16:00. Imparte os obradoiros Emilio Gómez Álvarez. 
• Xoves 5 no IES As Bizocas do Grove, ás 8:30 e ás 10:00. Imparte os obradoiros Paula Méndez Casais.
• Xoves 5 no IES Lucus Augusti de Lugo, ás 9:35 e ás 11:45. Imparte os obradoiros Maica García Rodríguez. 

Estes obradoiros forman parte dun total de 90 que pretenden chegar a uns 3.000 rapaces e rapazas de toda a comunidade. Rosa María Bueno Crego, Xosé Lois Carrión González, Pablo Díaz Bouza, Maica García Rodríguez, Emilio Gómez Álvarez, Mónica González Alonso, Olalla Liñares García, Sara Martínez Fernández e Paula Méndez Casais son os e as xornalistas –todos eles con ampla traxectoria profesional– que están impartindo talleres en distintas localidades galegas.

Nestas sesións de 90 minutos de duración, dirixidas a alumnado de Secundaria, a rapazada entra en contacto co mundo xornalístico, coñecendo máis de preto o panorama informativo e o funcionamento dos medios de comunicación. Así, combinando teoría e práctica, trátanse cuestións como a liberdade de expresión, o dereito á información, os xéneros xornalísticos, a estrutura das noticias, a selección e xerarquización de contidos, as fontes de información, a diferenza entre os medios públicos e privados, a manipulación e a censura, os riscos e oportunidades da era dixital ou a importancia do propio oficio xornalístico. O obxectivo principal é trasladarlle ao alumnado saberes e ferramentas para seren usuarios formados, críticos e responsables á hora de informarse.

Este proxecto, que se pode seguir en twitter baixo o hashtag #XornalismoNaEscola, naceu grazas a un acordo acadado a finais de 2015 entre o Colexio Profesional de Xornalistas de Galicia e a Obra Social La Caixa. As dúas primeiras edicións de ‘Xornalismo na Escola “la Caixa”’ desenvolveron con grande éxito no 2016 e no 2017 máis de 150 talleres de comunicación en case setenta puntos da xeografía galega, levando estes obradoiros a miles de alumnos e alumnas da comunidade galega.

A Obra Social ‘la Caixa’ está a levar esta iniciativa a outras cidades e comunidades autónomas, onde xa hai algúns anos que se puxo en marcha o proxecto. Cataluña, Sevilla e Madrid son algúns deses lugares onde se ven celebrando obradoiros de similares características.

CPXG