O acto de entrega ao Sindicato de Xornalistas Palestinos do XXI Premio Xornalistas de Liberdade de Prensa, organizado polo Colexio Profesional de Xornalistas de Galicia coa colaboración da Deputación da Coruña, a través da área de Dereitos Civís, tivo lugar esta mañá  no Centro Galego de Arte Contemporánea en Santiago. Nasser Abu Baker, presidente do sindicato, asegurou que a situación dos xornalistas en Palestina na actualidade é "inimaxinábel".

A cerimonia de entrega, presentada pola xornalista Ainhoa Apestegui, deu comezo ás 12:30 cunha pequena actuación da música galego-palestina Najla Shami e as saudacións de Belén Regueira Leal, decana do Colexio Profesional de Xornalistas de Galicia, e Soledad Agra Tuñas, deputada da Área de Dereitos Civís da Deputación da Coruña. A continuación, Anxo Quintela deu lectura ao manifesto "Estamos dentro", elaborado por el mesmo con motivo do Día Internacional da Liberdade de Prensa, no que se pregunta se a desafección pola información "non a sentimos tamén os xornalistas" e avoga por utilizar a imaxinación para pensar "outro xornalismo posible nestes tempos complicados".

Tras unha nova peza musical e a proxección dun vídeo sobre o labor do Sindicato de Xornalistas Palestinos en favor da liberdade de prensa en Gaza, Nasser Abu Baker participou dun coloquio coa xornalista Valeria Pereiras, onde debullou as condicións que sofren as e os comunicadores en Palestina. Abu Baker recordou que "o goberno israelí non quere que ningún de vós vexa a realidade do que pasa alí" e que son os xornalistas palestinos en Gaza "os que están a mostrar o que acontece e, polo tanto, os que facilitaron que esteamos hoxe aquí". O presidente do sindicato afirmou que Palestina vive "unha situación inimaxinábel" onde "non hai ningún xornalista que non sexa vítima" e chamou ao conxunto dos xornalistas a "seguir saíndo á rúa para denunciar todo o que está a acontecer e reclamar ao Tribunal Penal Internacional que interveña". "Coa unión dos xornalistas a nivel mundial podemos parar estas atrocidades", asegurou. A entrevista contou tamén coa participación a distancia de Marcos Méndez, Premio José Couso en 2023, que actualmente traballa en Cisxordania, quen dixo que "ningún xornalista galego dubida hoxe de que se hai alguén no mundo que estea a loitar pola liberdade de prensa, eses son as e os xornalistas dos territorios ocupados".  

Finalmente, a decana do Colexio Profesional de Xornalistas de Galicia fixo entrega do premio, consistente nunha imaxe do fotoxornalista Óscar Corral, recente gañador do Premio Ortega y Gasset á mellor fotografía, a Nasser Abu Baker. No seu discurso de agradecemento, o presidente do sindicato cualificou a situación en Palestina de "guerra mediática de exterminio" e lembrou que, con todo, "os xornalistas palestinos continúan a realizar o seu traballo ao máis alto nivel de profesionalismo, pero en condicións moi perigosas e inhumanas". "O que nos fai sentir fortes", asegurou, "é o grande apoio brindado por amigos leais aos principios humanitarios, á liberdade de prensa e á defensa dos xornalistas", polo que agradeceu un premio que considera "un evento histórico" polo que significa como acto de solidariedade con Palestina e que dedicou ás familias dos xornalistas asasinados.

O acto pechouse cunha última actuación de Najla Shami, sobre a que se proxectou un vídeo en lembranza dos máis de douscentos xornalistas palestinos asasinados desde o 7 de outubro de 2023. 

A candidatura premiada