Anabel Hernández García (México, 1971) é unha xornalista e escritora mexicana. Ameazada de morte polas súas investigacións sobre as conexións entre o narcotráfico e a administración, é unha das moitas mulleres e homres cuxa vida está en perigo por exercer o xornalismo.

Anas Aremeyaw Anas (1970) é un reporteiro de investigación ghanés que realiza desde hai máis de 10 anos reportaxes sobre dereitos humanos, utilizando o seu anonimato como ferramenta de investigación. Poucas persoas viran o seu rostro até que o revelou nunha entrevista da BBC en novembro do 2015. 

Miguel Ángel Aguilar (Madrid, 1943) é un veterano xornalista e o Secretario Xeral da Asociación de Xornalistas Europeos. Dende 1980 ata 2015, desenvolveu o seu traballo como columnista de El País, xornal do que foi cesado o pasado mes de novembro como consecuencia de criticar o diario nunha reportaxe para o The New York Times. 

Olga Rodríguez Francisco (León, 1975) é unha xornalista e escritora especializada en información internacional, Oriente Medio e Dereitos Humanos. É licenciada en Xornalismo pola Universidade Complutense de Madrid e Especialista Universitaria en Contenciosos de Oriente Próximo na UNED.

Reporteiros Sen Fronteiras ou RSF (Reporters sans frontières) é unha organización non gobernamental internacional de orixe francesa que defende a liberdade de prensa no mundo e, en concreto, aos xornalistas perseguidos pola súa actividade profesional. 

Jesús Blasco de Avellaneda (Melilla, 1981) é un destacado xornalista, fotoxornalista, videoxornalista, fixer e produtor español referente no xornalismo social e de dereitos humanos a nivel internacional que destacou por o seu traballo pola defensa dos valores fundamentais, a liberdade de expresión, a obxectividade e a veracidade na fronteira sur de Europa.

Xornalista freelance, blogueiro e tuiteiro coñecido como Principia Marsupia, natural de Cantabria, é doutor en Física Teórica pola Universidade Complutense de Madrid e completou o seu doutoramento en Física Teórica na Universidade Pierre et Marie Curie Sorbonne de París. Posteriormente, traballou como investigador na Universidade de Cambridge.