O Colexio Oficial de Farmacéuticos da Coruña celebrou este mércores 16 de decembro a entrega do seu XX Premio Albarelo de Xornalismo, correspondente ao 2019, fallado o pasado mes de febreiro pero cuxa entrega fora posposta pola situación sanitaria. Finalmente, o acto de entrega foi realizado de maneira virtual para respectar o distanciamento social imposto pola pandemia. 

Nesta edición, foi recoñecido como traballo máis destacábel unha reportaxe sobre a problemática dos desbastecementos da autoría de Celia Díaz e Chus Silva, emitida o 4 de maio de 2019 dentro do programa Panorámica da Radio Galega. Ademais, o Colexio de Farmacéuticos outorgou tamén dous accésits: a  Isabel Bravo, polo programa radiofónico La prevención del suicidio. Un problema de salud pública, emitido o 27 de outubre de 2019 en Radio Coruña Cadena SER; e a Carmen Torrente, pola reportaxe “Farmacéuticos rurales, ejemplos de supervivencia ante nuevos recortes”, publicada en Correo Farmacéutico o 24 de xuño de 2019. 

No seu discurso, a gañadora Celia Díaz Reija quixo dedicar o premio "ao colectivo farmacéutico, a todos os sanitarios que desde o comezo da pandemia se manteñen ao pé do canón". Recoñeceu tamén a importancia do Premio Xornalístico Albarelo, que "contribúe a darlle visibilidade ao traballo das e dos profesionais das farmacias. Un colectivo que, na miña opinión, non sempre recibe o recoñecemento que merece".

O Colexio Oficial de Farmacéuticos da Coruña aproveitou a entrega do galardón para lembrar que o vindeiro 4 de xaneiro remata o prazo para enviar candidaturas ao Premio Albarelo na súa edición do 2020. 

CPXG