Na reunión que mantiveron este martes con motivo das próximas eleccións galegas, Sarria insistiulle á candidata de Cs na necesidade de resolver politicamente os problemas que afectan á profesión da nosa comunidade, os máis importantes dos cales xa se lle comunicaran por carta a ela e ao resto de candidatos das principais forzas. Entre estes, cómpre salientar algúns como a aprobación do Estatuto do Xornalista Profesional e a Lei de Garantías do Dereito á Información da Cidadanía, o modelo de medios públicos, a xestión da información electoral, as axudas aos medios e a publicidade institucional, os dereitos das mulleres ou a creación do Consello da Comunicación de Galicia. O decano do CPXG asegurou na xuntanza que "é vital que os partidos políticos se comprometan cuns medios públicos plurais e independentes". 

Beatriz Pino asegurou que "resulta lóxico que desde as administracións públicas se trate de dotar do marco legal necesario para que poidan desenvolver a súa actividade en liberdade". Neste sentido, afirmou que entre as súas propostas se encontran "reducir o peso político que controla os nosos medios de comunicación públicos" e  "suprimir as campañas de propaganda institucional". A candidata comprometeuse tamén a potenciar o Portal de Transparencia da Xunta de Galicia e a propór ao Consello de Administración da CRTVG a retransmisión en directo de todos os plenos do Parlamento pola segunda canle. 

O Colexio de Xornalistas solicita de todas as forzas políticas un compromiso público con medidas que garantan o libre exercicio do direito de información en Galicia. Para isto, ponse a disposición dos distintos candidatos para presentarlles de maneira presencial as reclamacións máis importantes da nosa profesión. Xa están confirmados os encontros con representantes do PSdeG e de Marea Galeguista, que se realizarán nos próximos días. 

CPXG