Este xoves 13 de xullo fanse 500 días do encarceramento de Pablo González en Polonia, sen que fosen resoltas en ningún modo as vulneracións de dereitos e as trabas á liberdade de prensa que implican o seu caso. A súa muller denunciaba hoxe que se seguen a descoñecer as acusacións que pesan sobre el (alén dunha xenérica referencia á espionaxe) nin as probas que as sustentarían, que só se lle permitiron dúas visitas familiares e que lle está a impedir a comunicación telefónica cos seus fillos, así como que perdeu moito peso neste medio millar de días de cadea.

Xornalista e politólogo vasco especializado na información da órbita ex soviética, Pablo González foi acusado de "prorruso" mentres informaba sobre o Donbás polos servizos secretos ucraínos, que o convidaron a abandonar o país. De volta en Polonia, cubría a chegada de refuxiados cando foi detido pola intelixencia dese país o 27 de febreiro de 2022, e desde entón atópase na cadea. Ese mesmo ano, foi un dos candidatos ao XVIII Premio José Couso de Liberdade de Prensa.

O seu caso xerou desde o comezo a condena de numerosas organizacións, como a Rede de Colexios Profesionais de Xornalistas, Reporteiros Sen Fronteiras, o Comité para a Protección dos Xornalistas ou numerosas organizacións sindicais. Con motivo dos cincocentos días de encarceramento, o Colexio Profesional de Xornalistas de Galicia volveu reclamar ás autoridades polacas que respecten os dereitos de Pablo González e ao goberno español que interceda para pór fin á intolerábel situación de indefensión do xornalista.

CPXG