O Colexio Profesional de Xornalistas de Galicia realizou onte, na sede do Faro de Vigo, o primeiro dos obradoiros que levan ás redaccións galegas a formación para mellorar o tratamento informativo das violencias contra as mulleres. Fátima Frieiro, unha das xornalistas formadas especificamente na materia polo Colexio, trasladou aos e ás profesionais do xornal vigués ferramentas profesionais, adaptadas ás esixencias e ritmos de traballo dunha redacción, para mellorar a calidade das informacións sobre as violencias machistas. Esta experiencia, pioneira na nosa comunidade, é posíbel grazas ao convenio asinado coa Consellería de Politica Social e Igualdade da Xunta de Galicia, no marco do Pacto de Estado contra a Violencia de Xénero para o ano 2025

O Encontro de Xornalismo Social "Somos Esenciais", organizado polo Colexio Profesional de Xornalistas de Galicia, coa colaboración de Gadis, serviu para analizar os retos que supón unha información que responde aos problemas da cidadanía e establece vínculos coa propia sociedade. Lara Graña Prieto, Ángel Paniagua Pérez, Alba Chao Vázquez e Carolina Sertal Souto partiron dos traballos que lles valeron o recoñecemento do Premio Somos Esenciais para reivindicar un xornalismo que poña cara á información.

A Bolsa ‘Nacho Mirás’ para xornalistas noveis, organizada e desenvolvida polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da Universidade de Santiago de Compostela, recaeu na súa décima edición en Trescentostrece. Este é un proxecto divulgativo que busca contar, dende cada un dos 313 concellos de Galicia e mediante as redes sociais Tiktok e Instagram, a diversidade cultural, social e histórica do país. A proposta foi presentada por Paula Pérez Cantelar, Xoel Rodríguez Poy e Iria Ramos Mesía.

O Colexio Profesional de Xornalistas de Galicia segue mantendo aberta a promoción con motivo do seu 25 aniversario, pola que as e os xornalistas que se dean de alta até o 31 de decembro deste 2025 non terán que pagar os gastos iniciais de colexiación. 

O foro participativo Un país coa súa lingua, impulsado polo Consello da Cultura Galega e que contou coa participación de Ana González Liste en representación do Colexio de Xornalistas, vén de publicar o seu informe de conclusións con propostas para revitalizar o uso do galego. No que fai ao ámbito xornalístico, o documento alerta dun "compromiso desigual dos medios de comunicación" e propón unha serie de medidas a curto e medio prazo, encabezadas polo reforzo dos requisitos lingüísticos nas axudas a medios. 

O Colexio Profesional de Xornalistas de Galicia, coa colaboración de Gadis, organiza o vindeiro martes 21 de outubro o Encontro de Xornalismo Social "Somos Esenciais" para reflexionar sobre a información que dá voz aos problemas da sociedade e se pon ao servizo da cidadanía. O acto, gratuíto e aberto para todo tipo de público, celebrarase a partir das 19.00 horas no salón de actos do Marco de Vigo (Rúa do Príncipe, 54) e contará coa presenza de Lara Graña Prieto, gañadora do V Premio de Xornalismo Somos Esenciais, así como da premiada e os finalistas das dúas últimas edicións do certame.

Mentres se negocia un posíbel acordo de paz, os dous anos de ofensiva israelí na Faixa de Gaza colocan nunha situación moi delicada a defensa da liberdade de prensa a nivel internacional. Aos numerosos ataques contra informadores, que provocaron máis de 250 mortos, súmanse a censura, a prohibición de entrada á prensa internacional ou o secuestro de xornalistas en augas internacionais, nunha loita polo control da narrativa que xustifica de maneira intolerábel utilizar a profesionais da comunicación como obxectivos. 

O Colexio Profesional de Xornalistas de Galicia pon a disposición, de maneira gratuíta, tres webinars máis dos accesíbeis a través da súa plataforma de formación online. As colexiadas e colexiados poderán formarse así de balde en cuestións como a actualidade xudicial, o tratamento da información relativa a menores ou o xornalismo de datos. 

As Recomendacións para profesionais dos medios de comunicación ao informar sobre a conduta suicida, presentadas hoxe, recollen pautas para realizar un tratamento responsábel da conduta suicida que sirva tamén para contribuír á súa prevención. O documento está realizado polo Colexio Profesional de Xornalistas e a Xunta de Galicia, a partir dun grupo de traballo no que participaron xornalistas, profesionais da saúde mental e membros da Consellería de Sanidade e da Facultade de Ciencias da Comunicación da USC.

Ana Pardo, Xosé Cuns e Clara de Vega presentaron este mércores na sede do Colexio de Xornalistas a campaña #OrgulloTerceiroSector, coa que a EAPN Galicia - Rede Europea contra a Pobreza e a Exclusión Social quere desmontar os prexuízos sobre o traballo das entidades sociais e pór en valor a súa contribución á transformación social. O acto contou coa introdución de Manuel Rey, membro da Xunta de Goberno do Colexio Profesional de Xornalistas de Galicia.